屯の大阪章魚燒 (已結業)

大家兒童節食完晚飯仲未夠喉，去咗呢度買章魚燒，呢間店係姨甥呢期嘅愛店，聽說放學時間要等1小時以上，地點認真僻，在橫巷內大廈地下一間小店，去到要排隊，好在條龍唔長！媽咪買飛後等攞，門面好細，紅色招牌搶眼，可以透過玻璃見到店員整章魚燒，好快媽媽攞咗一袋3個紙盒出來，紙盒無招牌，好簡約！打開每盒6粒！原味大阪風（$20/6粒）賣相幾靚，食咗一粒，唔知點解個皮軟身，一啲都唔挺，已經即刻食都軟趴趴，入面嘅章魚好大粒，彈牙有咬口，粉漿滑身，醬油加沙律醬味道鹹香，仲有大量木魚片（不過我唔喜歡木魚片）味道其實幾好，只係質地太淋！榻晒！超爆多蟹子（$28/6粒）同原味差不多，但呢個外皮仲淋！已經扁晒！面頭嘅蟹子真係超級多！粒粒都卜卜脆！但章魚燒本身質地唔啱！一般！店員好快手，不停手整章魚燒！小朋友一定喜歡！