部落美食 (已結業)

是日係人日，同時亦係久違終於可以開放番晚市嘅日子，梗係要出去慶祝吓啦。今日係深水埗做完野，順便睇下呢頭有咩新野食啦，巧遇呢個深水埗轉角嘅路邊小店，門外有木枱膠椅子坐住食串燒，係久違嘅感覺，好啦，今日就試你啦，果然無令我失望。原來平時佢中午主要係做車仔面，晚市才主打串燒。事不宜遲，介紹咗我成晚最欣賞嘅串燒先...就係1）蒜蓉燒帶子。$38 有成2 件！重點係好大粒帶子，蒜蓉味仲勁香濃，仲有少少辣，我最後連汁都食埋！我嘅第二位係2）流心拉芝韓炸雞喇$38/細份！話說老闆見我好失望無得試車仔撈面，特登推介我食呢個，老闆仲話呢個平時成日好快賣哂嫁。原來佢除咗外面有呢層芝士，入面都有拉芝嫁，雞肉仲要唔「鞋」又完全唔乾！ 我朋友都讚好食～最後有兩個並列第3名。分別係3）燒魷魚$30同蒜蓉牛油烤雜菜$13。魷魚好彈牙，味道都調教得好好。而菜菜就好特別，非常有驚喜，基本上接近無一隻菜我係有食開嘅。分別有龍鬚菜、白玉木耳、青竹荀、千菜豆腐絲等等。整體上都係比較爽口嘅菜，好奇嘅朋友可以去試下。整體都好唔錯，感覺上都好乾淨。可能新開，同事都好積極，同朋友暢聊食串燒真係好暢快。下次等我試埋佢個車仔撈面先！