皇茶 (已結業)

當日我嘅腸胃唔係太好，係旺角行街見到呢間手搖飲品店有多款水果茶選擇，仲可以加埋奶蓋，清清腸胃一流。小店地方唔算大，但環境佈置幾有心思，放咗唔少有香港特色同為香港打氣嘅文宣，值得支持。-火紅芝芝 $38由火龍果製成嘅冰沙，份量總算對得住$38呢個價錢，高身杯裝大大杯，兩人分享飲用都足夠。其實自己對火龍果無特別鍾意，平時要揀都會揀其他水果款式，但同行人話想飲火龍果，所以就揀咗呢杯火紅芝芝。火紅芝芝係冰沙+奶蓋嘅組合，而芝士奶蓋之上原來仲有一層Oreo碎。我都幾鍾意食有Oreo配料嘅甜品，所以呢杯都加咗啲分。芝士奶蓋都幾厚身，質地稠身，芝香濃郁。火龍果冰沙入味夠清甜，唔會出現因為加咗碎冰所以令整體甜度變淡嘅問題。最重要係冰沙起到中和芝士奶蓋膩感嘅作用。