Sujata Cafe

營業中

休息中

傳統嘅中式素食有啲都係同宗教相關，又或者款式選擇比較少，而西式嘅素食通常都係由健康主義開始，喺等人收工嘅時候又想搵個位坐下做下手頭上嘅嘢於是黎左呢度。西式嘅擺設再加上佛教嘅飾物同書籍，喺呢度，有一種令人覺得好安靜和諧嘅感覺，由於比較少接觸西式素食嘅關係，對住菜單諗咗一陣間，店員好友善主動咁介紹呢度比較特色嘅素漢堡，我再加一杯洋甘菊。賣相一啲都唔差過真嘅漢堡，由於我真係比較少接觸素食嘅材料，可能表達得未必好準確：第一層有啲素嘅煙肉同埋類似芝士嘅東西，加上有番茄，係比較清新同埋酸酸甜甜嘅感覺，第二層有一塊係素嘅扒，唔係平時食素雞素鴨嗰種滑潺潺、爽口嘅質感，又真係有啲似肉咁樣幾實在架，而呢一塊扒係用咗炸嘅方法去處理，可以話係外脆內軟，我就覺得好食過某快餐店嘅豬柳包同魚柳包裏面嘅肉喇。 麵包其實反而係一個驚喜，真係幾好食幾香，裏面仲有少少蒜蓉包嘅感覺。呢個環境真係令人有一種心靈好平靜嘅感覺，而且即使我只係一個人坐咗喺度，店員亦都冇催交枱，係一個幾好嘅用餐經驗。