Pho Metro (已結業)

今日同媽媽去感謝祭，行咗好耐，我哋都好攰，又無乜胃口，唔係好肚餓嘅情況下，想食啲清新健康嘅食物，行過白沙道見到呢間裝修幾靚嘅pho metro，心諗越南嘢清清地就啱晒啦！我哋首先叫咗個開胃小食 － 鮮蝦米紙卷，真正的皮薄餡靚，生菜好新鮮好脆，鮮蝦大大隻鮮甜美味，份量啱啱好！想食得清清地，就叫咗呢個扎肉湯檬，呢間餐廳嘅扎肉比起其他越南餐廳更爽口彈牙，薄薄地但足足有6片，份量足夠，而且檬粉大大碗，好好味，但最後都食唔晒...媽媽就叫咗個勁惹味嘅選擇 － 蟹膏湯河！呢個真心推介，非常足料之餘個湯底充滿濃濃嘅蟹肉蟹膏，即刻勁開胃！呢度仲有啲好似溫室種植香草嘅佈置，相信係方便新鮮摘落嚟即刻放入餸菜裡面供客人享用！得閒嚟開銅鑼灣可以試下呢間誠意小店！