僕之拉麵 (已結業)

自從有返晚市，我就急不及待約朋友見吓面，今日就約咗朋友去僕之拉麵食個麵兼見個面。拉麵店通常嘅招牌菜式就係佢哋嘅湯底，呢度主打豬骨湯，亦有分濃湯同清湯。另外仲有唔同嘅小食可供選擇。我一向比較貪心，所以就揀咗份量最多嘅特選拉麵，而呢碗拉麵就選擇咗配以清湯原味。估唔到清湯嘅味道都咁豐富，非常鮮味，絕對係多飲無妨。而我揀特選拉麵嘅原因，就係俾呢條炙叉燒吸引住。炙叉燒有炭燒嘅味道，半肥瘦嘅豬肉燒得夠甘香而且又不太油膩。味付雞蛋做到蛋黃呈半熟，非常好味！兩塊紫菜浸落清湯享用，更加是絕配。朋友就揀咗簡單啲嘅叉燒拉麵配以濃湯原味。講到明係兩倍叉燒，所以叉燒嘅份量多到可以圍滿整個碗邊。豬骨濃湯嘅油脂比較豐富，飲起上嚟較有質感，配合拉麵味道亦唔錯。嚟到冇理由只係食拉麵，一於叫多兩份小食開心share。炸雞上枱熱辣辣，因為用上雞髀肉，所以口感特別嫩滑。炸章魚亦係我嘅至愛，口感彈牙，加埋包圍住嘅炸漿，真係可以食唔停口！