影片
更多
2013-10-05
232 瀏覽
「清朝大臣」？標題「清潮大頤」唔喺打錯字，「清酒」+「潮州菜」=「大快朵頤」 ，真喺未試過清酒配潮州菜，今晚一於大快朵頤，痛快淋漓享受口福之樂，事發地點就晌旺角新世紀嘅百樂。是晚飯局中，認識到數位新朋友，雖然小弟較內歛，唔多發聲，但絕對食得極之開心，除咗品嚐多款既特色，又味美嘅潮州真味之外，因為聽到大家不斷發放笑彈，笑聲不絕，實在愉快 ！晌新世紀廣場，由地下搭扶手電梯一路上嚟5/F嘅百樂潮州酒樓，見廣場內好多鋪位翻新，而且仲已經開咗唔少有份量或具知名度嘅食店，相信遲下新世紀廣場又有一番新景象。講番百樂，可能喺快樂星期五，一踏入門口，已見座無虛席，誇張少少講可以話喺人聲鼎沸。裝潢比較平實，一邊有落地屏風分隔嘅4-5人枱，另一邊入牆櫃擺咗好多花樽、古玩，多添幾分雅氣，大堂中央位置就喺多張8人、10人枱等等，另外仲有一啲廂房，整體而言屬雅緻不浮誇。最近，店家仲搞搞新意思，只要同枱有兩位客人上「面書」讚一讚百樂潮州酒家嘅專貢，就有一次幸運輪抽獎，獎品有指定小菜、糖果一份、工藝花茶、指定甜品、全單九折……等等 ，務求讓大家開心快樂！雖然邊食邊飲，但都一次過先分享公關朋友特意帶來嘅3枝清酒：
晌新世紀廣場，由地下搭扶手電梯一路上嚟5/F嘅百樂潮州酒樓，見廣場內好多鋪位翻新，而且仲已經開咗唔少有份量或具知名度嘅食店，相信遲下新世紀廣場又有一番新景象。講番百樂，可能喺快樂星期五，一踏入門口，已見座無虛席，誇張少少講可以話喺人聲鼎沸。裝潢比較平實，一邊有落地屏風分隔嘅4-5人枱，另一邊入牆櫃擺咗好多花樽、古玩，多添幾分雅氣，大堂中央位置就喺多張8人、10人枱等等，另外仲有一啲廂房，整體而言屬雅緻不浮誇。
最近，店家仲搞搞新意思，只要同枱有兩位客人上「面書」讚一讚百樂潮州酒家嘅專貢，就有一次幸運輪抽獎，獎品有指定小菜、糖果一份、工藝花茶、指定甜品、全單九折……等等 ，務求讓大家開心快樂！
雖然邊食邊飲，但都一次過先分享公關朋友特意帶來嘅3枝清酒：「南部美人．吟Ginga純米吟釀」、「獺祭．三割九分．純米大吟釀」、「富久長．純米柚子健康酒」，有間中睇過吓小弟嘅食評都知，小弟唔多好酒，算叫飲得幾杯，但未喺好識品嚐，所以，純以個人口味嚟跟大家分享。「南部美人」喺岩手縣名物，雖然帶有青蘋果香味，但酒精度去到50% ，小弟只喺淺淺淺嚐，唔好意思，未喺好真正能夠飲出咩味道，據介紹，配濃味或較肥膩嘅食物最突出佢嘅解滯膩功效；第二款「獺祭」無咁勁，酒精度16%，易入口好多，淡淡酒香，嗒落確喺有少少梨子香味，感覺特別，由於配海鮮最合襯，所以邊飲邊食凍花蟹；至於第三款「富久長」，最深得大家歡心，除了酒精度低之外，重重嘅柚子香最叫人飲得順喉，唔介紹唔知，依款酒加入大量高知縣產嘅柚子及廣島縣產嘅檸檬，仲未夠，再加入蜂蜜精製而成，酸甜有致，好似飲緊一杯雞尾酒，添飲唔該 。
滷水系列（滷水鵝肉、豬耳仔、滷水雞蛋豆腐、滷水鵝肝、滷水豬腳筋） 未試過一次過食咁多款滷水嘢，款款一碟，絕對足夠我哋樣樣都試勻。滷水以鵝肉、豬腳筋及鵝肝做得最為入味，味道醇香沉實，鹹香適中，而鵝肉嫩滑味濃，蘸點白醋，鵝味更突出，豬腳筋又好有驚喜，軟腍到不得了，好似食緊花膠咁，鵝肝入口粉嫩甘腴，正正各有特色；此外，豬耳仔我都幾鍾意，冰涼爽口，咬落有嚼勁，滷水豆腐就真人不露相，以為平平無奇，原來入口十分軟滑，只可惜滷水味無滷鵝、滷豬腳筋嗰幾樣嘢咁入味。
涼伴魚皮 魚皮裁得大大件，又夠厚身，食得過癮，口感清涼、爽彈，滿口麻油香。原來工序都幾繁複，以鯇魚皮去鱗、厚切、白灼，再放入冰水冷藏，跟手用麻油、薑蔥、芫茜調味涼拌而成。
醃螄蚶 螄蚶喺潮州菜中頗為特色嘅美食，不過，由於衛生問題，好多鋪頭以安全起見，都甚少供應生醃螄蚶，所以今晚晌度食到，實屬難得呀！螄蚶外殼擦得亮白，簡單以蒜頭、椒絲、生抽醃製，一搣開個殼，血紅飽滿嘅螄蚶肉立時呈現眼前，有人可能覺得核突，但咁道正正表明肉質新鮮，確實螄蚶肉啖啖鮮甜，又鹹鹹爽爽，一粒螄蚶肉，一粒蒜頭，幫幫殺菌，感覺更加安心啲。
金鐘雞 名字好特別嘅涼菜，一直未上枱，都唔知佢葫蘆賣咩葯。點知一送上枱，齊齊嘩聲四起，賣相絕對攞滿分，無論擺盤、裝飾，以至「金鐘雞」本身，都別具特色。原來又喺一番心機製作，淆高湯、切雞絲、混入芫茜、杞子，再雪凍做成 金鐘形啫喱狀，前前後後搞足4小時。依道菜要趁凍食，攤番暖就少咗份冰涼感，晶螢嘅啫喱凍有著高湯嘅濃郁，雞絲很滑溜，配合埋清香嘅芫茜，不愧為一道已有逾40年歷史嘅功夫菜 。
以上分享咗多款冷盤涼菜，單單前菜已咁精彩，主菜方面又如何？由於相片眾多，又想逐一跟大家分享，故此，只好「下篇」再續！
張貼
