Wooden House (已結業)

今日去開附近嘅中南買嘢，落雨又想食西餐，就入咗呢度啦。入到去個環境都幾舒服，靜靜地唔會太嘈太熱鬧。<龍蝦湯配紅蝦刺身，$98>個蝦刺身原來已經切好左，放得好靚。店員提及可以將刺身放入湯，食落就會暖暖地。個人比較喜歡就咁食，對於暖嘅刺身無乜好感。平時無乜飲開龍蝦湯，呢個覺得都唔錯。<西班牙伊比利亞黑毛豬配烤紅椒堅果醬，$288>黑毛豬略嫌過熟，食落有少少韌，本身期待會比較腍，所以有少少失望。而佢個烤紅椒堅果醬唔算好特別，食落唔辣又無乜味。配菜反而做得好好，薯仔輕輕煎過食落好香口而又不膩，蕃茄仔多汁鮮甜。<芒果沙冰，$45>芒果沙冰有別於平時飲開嘅泰式芒果沙冰，好似加少少奶類去做成嘅沙冰，感覺比較杰身，芒果味唔算濃郁，但勝在唔會好甜。<窩夫配意大利雪糕，$58>窩夫比較實，唔係外脆內軟改嗰種感覺，但係個味道都唔錯嘅。我哋都覺得個意大利雪糕唔夠滑，不過朱古力味夠晒濃郁。價錢中規中矩，如果想同另一半去一啲清靜環境嘅餐廳慶祝記念日都係一個唔錯嘅推介。