大飯糖甜品小食屋 (已搬遷) 新店位置

難得黎到元朗探朋友，梗係宵夜直落啦，減肥都係留返下次先🤭。朋友住喺洪水橋附近，由佢帶路捐窿捐啦搵食，就帶左我去呢間糖水舖。坐低望望餐牌，原隻椰皇已經完全吸引住我，仲要有北海道3.6軟雪糕，同平時食開其他糖水鋪整既椰皇甜品完全唔同，今晚就一於試吓呢個芒果爺爺！果然係用北海道3.6牛奶做雪糕，牛奶味特別香濃，又夠滑，食落去真係唔同㗎。中間又有好多大大舊既芒果，芒果夠甜，好好食。但最估唔到既係底層，用上椰皇既汁整既果凍，食落有陣陣椰皇既清甜，少少爽口，好清新既感覺。兩個人開心share岩岩好！叫多左個D24榴槤班㦸，未食已經聞到榴槤飄香。食落口榴槤既味道濃郁，果肉多過忌廉，皮薄饀靚，正！