源記喳咋 (已結業)

佐敦佳佳無人不識啦，不論係假日定平日都滿滿人龍，搞到我地都冇乜意欲去等。結果黎左呢間源記喳咋，聽講話喺廟街都有好耐歷史，唔知同鵝記有冇關係，哈哈。店面唔大，但光猛企理，有啲靠牆位置，有啲長枱，店員都幾有禮。糖水方面有傳統中式野，例如腐竹、芝麻糊花生糊合桃糊、綠豆、渣咋等，可以雙拼或加料，例如雞蛋、湯丸等。凍食嘅有涼粉、大菜、紫米露西米露、豆腐花等，價錢廿零三十蚊。渣咋 $28渣咋都幾大碗，面頭加左花奶，所以賣相就唔係十分好睇。裡面有多款豆類，份量大方，有紅綠豆、花生、眉豆、腰豆、蓮子、西米等，食落以紅豆味道最出。甜度適中，濃稠剛好，啖啖有豆，香軟順滑，另外仲見到啲類似椰絲咁，口感豐富兼食完勁飽。香滑合桃糊 $28 +湯丸 $12/2粒合共40蚊，呢碗野high apru，尤其是湯丸12蚊得兩粒！合桃糊色澤對辦，望落就幾濃，面頭形成一層薄膜，味道冇想像中咁香合桃味，但糖水整體略甜。原本覺得不過不失，但湯丸係一大敗筆，size幾大粒，裡面係芝麻餡。但湯丸皮超厚超厚，餡極少，仲要冇芝麻味，成功將呢個糖水變成唔合格，性價比低。