花園餐廳 (東廣場) (已結業)

星期六我同妹妹2姐妹到聯合醫院探媽咪，探完之後正正係lunch 時間，但眼見裕民坊好多餐廳都已經執左，周圍望下仲有咩食，咁啱就見到有間花園餐廳咁就決定去食啦。去到時大約都2點，可能因為咁有好多空位，直入就有位坐了。難得妹妹話請客仲叫我一定要食牛扒，所以lunch 食豪少少鋸個扒先。我叫左個鐵板肉眼扒，唔知係咪慣左新式扒房，一般會一早問定你咩汁，佢會係上菜前淋埋但今次我見佢冇問，只係問我飲咩湯。我飲嘅係白湯，入面有雜菜粒，但都幾creamy係傳統嘅港式白湯。個扒上黎我仲係度諗梗個汁點算，之後已經見侍應拎左2個大筒黎問我要黑椒定蒜蓉，呢個時候我先醒起舊時係真係有侍應會係你份鐵板上菜時先幫你淋汁，於是我揀好左要蒜蓉汁後佢就叫我用餐巾庶住自己佢要淋汁啦。呢個動作我都好耐冇做啦，童年回憶出返黎，依家新嘅餐廳都唔會再有呢個場面睇，當汁淋上鐵板時昇上黎嘅煙高到上天花板，隔離檯小朋友都興奮到大叫火山爆發，哈哈。塊扒都係傳統港式醃到好淋身嘅牛扒，不過牛味就唔多夠，可能係醃得太過了，佢嘅配菜係薯條同菜，但估唔到係小唐菜，果然係好地道。蒜蓉汁亦唔太夠蒜味，不過食回憶又一流嘅。