火鍋撚 (日富里百好大廈) (已結業)

自己一向都好鍾意打邊爐，平時都會周圍去試吓唔同嘅火鍋店睇吓有冇驚喜，今次難得係港島區就試下呢間火鍋撚。餐廳座位寬敞唔侷促而且十分乾淨。餐牌有七款湯底選擇，有啲湯底西環限定，揀咗媽媽滋補老火湯鍋。湯底未嚟之前叫咗個黃金雞軟骨小食，呢個小食真係冇得頂，每一粒雞軟骨都包住厚厚的鹹蛋黃，鹹蛋黃味超濃郁，而且入口又爽脆，超級正重點推介小食。媽媽滋補老火湯湯底有紅蘿蔔、粟米、紅棗、龍眼、螺頭、瘦肉 、雞肉等等，開始落食物之前當然要試吓個湯底，湯底味道非常濃郁，飲咗幾碗先開始打。海鮮方面叫咗鴛鴦雙蚌同脆鯇骨腩，鴛鴦雙蚌即係珊瑚蚌同桂花蚌，可以一次過試晒兩款 👍🏻 兩款蚌都非常新鮮，而且仲會有溫馨提示牌話你知要淥幾耐食最佳。丸類方面侍應推介流心鹹蛋黃豬肉丸，果然冇介紹錯，豬肉丸裏面包住鹹蛋黃，鍾意食鹹蛋黃嘅朋友一定要叫呢款。試完侍應推介嘅丸後，侍應再推介黑松露墨魚滑，所以就叫咗份試試，試完真係返唔到轉 😍 食完再叫多份，因為實在太正喇 🤤 墨魚滑食起上嚟爽口之餘仲帶陣陣黑松露香味。見隔籬枱叫咗呢個拼盤自己心郁郁就叫埋 😋 拼盤有牛筋、牛肚同大腸，份量都唔少，而且洗得乾淨冇異味。