又一戟 (已結業)

唔知道大家去日本有冇食可愛餅嘅愛好呢?當然,日本嘅可麗餅淨係睇門面已經夠搶眼也可愛,大部份都係吸引少女們嘅Kawaii style,之但係我哋香港都唔輸蝕,如果要講到出色嘅可麗餅,就非<又一戟>莫屬喇。 對我嚟講,葵芳呢間分店應該係佢哋嘅發跡地,我好似細細個讀書時期(出賣年齡?!)已經開始幫襯佢哋,佢哋舖面一個個栩栩如生嘅班戟樣本,無論係咸嘅定係甜嘅都應有盡有,多年嚟水準依舊,亦都開始喺其他地區開咗分店。 今日嚟到葵涌廣場行街shopping,要填肚當然又心思思嚟幫襯佢哋喇。今次點嘅呢份係吞拿魚班戟,本身只售$26蚊,我另加芝士所以加多$4蚊就有交易喇。 葵廣呢間分店我次次嚟都客人不斷,由點單買飛開始輪候,職員所有班戟即叫即整,普遍都需時等大約七至八分鐘就可以食得到,雖然賣相冇日本咁精美,但佢嘅美味亦可以同日本一較高下,與其話佢只係一份吞拿魚班戟,我覺得佢可以叫做"吞拿魚沙律班戟",啱啱烘好嘅班戟皮唔算十分厚,蛋味好香,裡面除咗有吞拿魚餡料之外仲有加咗生菜同埋沙律醬,味道開胃可口,而我加錢加咗芝士就更加多一份層次,絕對可以同日本可麗餅媲美