古早味台灣原味 (已結業)

收工經過銅鑼灣，見到好評咁多，所以就決定一試。地點相當易搵，地鐵站一出對面就係。而且門面裝修幾靚，侍應服務態度唔錯，好主動招呼你。一入嚟就會主動問你幾多位幫你安排座位，座位唔會太迫，坐得幾舒服。叫咗嘉義雞肉飯，唔好見佢外表平凡，其實相當滋味，而且感覺都幾正宗。雞肉都幾滑，而且上邊有蛋漿，份量適中。另外叫咗麻油雞麵線，呢個大贊，唔會好油膩，但十足台灣風味，但係覺得麵線可以多少少，不過都夠食嘅。之後叫多個小食紅槽肉，呢個係我最鍾意嘅菜式，炸得來唔會油膩，而且炸粉唔會好多，啖啖肉。然後就叫多咗個地瓜圓，喺台灣食得多，喺香港就未食過。價錢當然冇台灣咁平，但以香港來講我覺得可以接受。而且味道都差唔多，可以一試。整體而言呢間餐廳唔錯，值得咁多好評。