樂群茶餐廳 (已結業)

有食友問我係米唔食麵包的，其實麵包由細食到大，好食的，我一樣會照食照讚的。星期日在維園踢了場「賀歲波」，雖然戰情劇烈，但最後和和果果，皆大歡喜。踢完波好肚餓，要吃點什麼補充體力，記得都好耐沒有幫襯這裡，就撇下去飲酒的波友，來了這裡。星期日都幾多人，老闆娘坐鎮在收銀處，幾位上了年紀的伙記及廚房，加上不少在吞雲吐霧的食客，好一個港式茶餐廳的格局。明明在出面見到菠蘿包，想叫但伙記卻說沒有供應，就叫了個豬扒包茶餐，加杯茶走。先來茶走，夠茶味又幾夠滑，不錯；豬扒包是港式整法，用的是長型的芝麻熱狗包，烘熱了，微脆，對辦。裡面除了炸豬扒外，亦有生菜絲、蕃茄，加入千島醬汁，味道真不錯。加上肚餓，是吃的幾滋味，這個港式豬扒包，掂！埋單18蚊，抵食，順腳經過要一試。