泰筏味泰國船河專門店 (已結業)

一踏入2018年無耐，我就激嬲咗A姐喇。最衰我衰多口啦，唉！而為咗要氹番A姐，佢俾咗個難題我，就係要搵間有泰式船河俾佢過吓口癮，其實喺香港食船河嘅地方好少，左搵右搵，今日就同佢到旺角同大角咀中間嘅泰筏味泰國船河專門店，希望佢食飽飽就唔好嬲啦。呢度嘅船河，分為牛肉類同豬肉類，有牛雜、牛腩、牛丸、豬手、脆肉、豬頸肉等等，而麵底就有河粉、金邊粉、綠茶麵同米粉。，牛雜船河金邊粉幼身滑口嘅金邊粉配上份量唔少嘅牛雜，最好味當然係有咬口又彈牙嘅金錢肚啦，而湯底肉味香濃，又唔油膩，唯一失望係湯底唔算好熱。脆肉船河同金邊粉相比，呢個河粉就係想對粗身同煙韌，各有千秋。脆肉即係燒肉，肥瘦均勻，皮仲好脆添。而食船河，當然唔少得調味料啦！肉碎生菜包份量十足，生菜新鮮脆口配埋微辣惹味嘅泰式肉碎、香菜同紅蘿蔔絲，食落仲有唔同嘅香料味，夠晒fresh。泰式生蝦味道幾鮮，不過，同出面嘅酸汁唔同，我M佬就唔太鍾意喇。酸辣鳳爪A姐就最鍾意食酸辣鳳爪，所以今日又點可以無呢味菜呢！鳳爪夠晒入味，酸酸甜甜咁，仲唔原諒我咩？