火鍋撚 (染布房街) (已結業)

之前一路都知旺角開咗間港版無老鍋，一直都想試，今次撞啱朋友生日，佢又話想試，就早早訂枱，用餐時間係個半鐘。準時去到，行到個位發現二人枱要搭枱，真係傻了眼你可以講佢係兩張長方型二人枱，但呢兩張枱係拍埋的，同搭枱基本上冇分別。咁坐低點菜啦，中價打邊爐價，我地兩個人，要左個鴛鴦鍋，一邊麻辣一邊酸菜白肉鍋。麻辣鍋好香，不過唔會死辣，有鴨血同埋蜂巢豆腐。酸菜白肉鍋有幾片豬肉，有紅薯粉墊底，初段至尾段都覺得味道幾好同開胃，不過食到尾覺得太酸。之後點左個細手切肥牛、響鈴、雜餃、黑松露墨魚滑拼干貝滑、皇帝菜、烏冬、一渣竹蔗茅根。手切肥牛好食，有咬口，半肥瘦，有牛味雜餃冇咩特別，不過魚皮餃偏咸。雙拼滑冇影到，不過夠爽口彈牙！響鈴即叫即炸，鬆脆好食，冇油溢味最後有糖水送，係腐竹糖水沙冰！賣相特別！兩個人盛惠$834，食物不錯，但環境太嘈，又迫，好似坐喺放題咁，我覺得呢個價錢有更佳選擇。