十三少酸菜魚 (已結業)

已經好一段時間唔敢北上搵食，最懷念嘅就係酸菜魚，要喺香港搵到可以媲美太二嘅酸菜魚真係唔容易，朋友屋企附近開咗間新店，知我鍾意食酸菜魚，誠邀我一齊去食。餐廳只有一張簡單嘅menu，選擇唔多，除咗招牌酸菜魚，仲有口水雞同浸翡翠苗，小食方面亦只有椒麻皮蛋同涼拌土豆絲。點完菜侍應為我哋送上小食，一問之下原來係粟米乾，食落味道有啲似爆谷，但口感似花生，幾香口。汽水十蚊罐，價錢尚算合理。怕只食酸菜魚份量會唔夠，浸翡翠苗同口水雞之間我哋揀咗口水雞，非常有驚喜！份量幾多之餘味道又香又辣，加上大量白芝麻，好香口！雞肉質感嫩滑，皮薄而且皮肉之間脂肪少，連皮食都唔會好心虛。酸菜魚份量都幾多，足夠兩個人食，味道同太二好相似。湯底香濃，既酸又麻且辣。酸菜又香又爽，淨食酸菜都別有一番滋味。魚肉切得夠薄，夾起唔容易散，入口又嫩又滑，充分吸收湯底嘅味道，令人欲罷不能！好開心搵到呢間酸菜魚，食物選擇雖然唔多，但貴在精，而且價錢公道，以後嘴饞嘅時候又多一個選擇。