餃里 (悅湖商場) (裝修中)

上星期六去朋友團屋企前，就嚟咗呢間屯門屋村好出名食餃子嘅餃里買外賣餃子去朋友屋企食。除咗平時食開最常見嘅餃子之外，佢呢度仲有芝士粟米餃、咖喱鮮肉餃、紫菜鮮肉餃，都幾特別喎。買多人份量最好嘅優點就係可以個個味試少少，於是我發板，揀咗韭菜鮮肉餃、香茜鮮肉餃、芝士粟米鮮肉餃、咖喱鮮肉餃、紫菜鮮肉餃各九隻，有湯有煎，超級豐盛。我仲買多咗盒12隻嘅生餃做聽日嘅早餐！可能因為買嘅份量有啲多，水都等咗一陣，係等嘅過程中，真係見到源源不絕嘅街坊人頭，小店好好生意！唔係講笑，每隻餃子都好肥大飽滿，我哋總共有六個人，食呢45隻餃子個個都食到捧住個肚走，果然真材實料，抵食夾好食！第二朝都急不及待咁煮埋個12隻生餃做同媽媽兩個人嘅早餐，包裝上有教點樣煮，好貼身。八人份量，買單都唔使$300 ，果然係平民美食，正！