東京大眾酒場 (已結業)

東京大眾酒場，係一間以日本居酒屋作為藍本嘅餐廳。餐廳嘅牆身畫滿咗日系圖作，仲有一部大電視播放住有啲年代感嘅動畫。廚房以半開放嘅方式呈現，有一邊係賣關東煮，俾客人可以親自揀選中意嘅關東煮，另外一邊可以睇到是日海鮮同埋廚師燒烤，旁邊仲擺放咗林林總總嘅日本酒，仲有餐廳自家製嘅酒。侍應非常親切，好似去咗一個日本溫馨小家咁。美人鍋($188)，最近美人鍋大熱，所以點咗黎食。美人鍋以健康為主，雞脾肉為主角，有大量嘅蔬菜作配菜。等15分鐘後，侍應仲會主動幫大家盛碗。先飲雞湯，清甜又有滋補嘅感覺~ 雞脾肉厚又嫩滑，因為冇加調味料，所以佢嘅鮮味都仲保留住。最後仲有烏冬，以濃郁嘅雞湯黎煮，味道一流。燒物方面，我地點咗和牛($28)、牛舌($32)、煙肉蕃茄($15)、黑毛豬腩($18)、大蔥雞肉($12)、胡椒柚子雞肉($15)、蠔($28)、秋葵($12)。燒物燒得非常香口，中意少少焦焦地嘅口感，而且調味唔重，原汁原味。日本魷魚($88)，真係物有所值！原隻上，塗上甜甜地嘅醬料一齊燒，口感爽滑，味道惹味。關東煮方面，我地點咗蘿蔔($12)、雞蛋($12)、竹輪($12)、福袋($18)、牛腸($18)。