樂香園咖啡室 (已結業)

嚟蛇竇食飯，除咗有食極唔厭嘅滑蛋乜乜乜碟頭飯系列，同埋食肉獸恩物嘅火腿午餐肉香腸煎蛋煎扒碟頭飯系列之外，原來仲有滄海遺珠，佢唔起眼咁瑟縮喺餐牌嘅一角，靜靜咁等緊你嗌佢，佢就係：栗米肉粒飯！講真，真係比較少人會討論粟米肉粒飯，我亦冇諗過會叫嚟食，不過今次咁啱見到隔離枱有個阿哥叫咗碟，望見幾靚仔 (講緊碟飯)，所以叫嚟試吓！先講賣相，碟飯上枱時，同滑蛋系列一樣，成個芡汁完滿地鋪喺飯面之上，呈一個大圓形，賣相好靚！栗米芡汁嘅顏色呈金黃，帶啞色而不會閃令令，即係冇落太多油，唔會太肥膩。而且，個芡呚汁功夫做得好適中，口感順滑唔會糊口，亦唔會一邊食一邊變得水汪汪。唔好以為咁樣嘅基本係好簡單，今時今日好多茶記為咗快～快～快～變成唔再注意賣相，對食物上枱時賣相嘅堅持，睇得出師傅對烹調食物嘅心思同認真！況且，亦有好多茶記因為成本嘅考慮，芡汁裏面加咗好多生粉水，扮到好滑咁樣，但就變得冇嚟色水，又淡茂茂，就算加番啲砂糖調味，都係假甜，冇晒粟米原有嘅香甜味 ...至於肉粒嘅肉質就比較一般，咬落有少少鞋口，可以接受啦，起碼唔會因為要肉質鬆軟而加鬆肉粉落去囉 ... 為咗更惹味，我多手加咗啲香辣油落去食，吊一吊味