串本屋 (已結業)

串本屋，一間食日本串燒嘅餐廳，舖內面積唔算大，日系feel設計，座位寬敞幾舒適。首先有前菜係冷盤醬汁蕃茄，非常開胃可以提升食慾！連同汁煮海螺一齊上，非常夾，呢個搞到我有錯覺以為呢兩個都係前菜添呀夾到都係冷盤，份量夠，海螺肉容易食，而且非常開胃醒神！炸物一定唔少得流心炸蝦球及吉列炸生蠔，炸得夠透，香口脆身。封門柳有鹽燒及蒜香兩款口味，都有牛肉鮮味，各有特色。我嘅必食推介係燒油甘魚鮫，燒得香噴噴，夠甘香，魚鮫好多肉，肉質細膩綿密，食得出鮮甜味。不要睇小晚市定食嘅菜式，原來厚燒牛舌飯會一試難忘，因為牛舌非常入味，嫩滑軟身，配埋軟硬適中嘅珍珠米，同埋甜美嘅醬汁，簡直係人間極品。而且跟餐有沙律菜及麵豉湯，仲可以加錢配一款小食，好抵。我揀咗焦糖燒菠蘿，唔止賣相靚，食落香甜解膩，一流。餐廳價錢親民，食物水準高，效率快，招呼又親切有禮，值得推薦。