漁樂鍋 (已結業)

早幾年真係沉迷雞煲，雞煲盛行，雖然近年多左好多圍爐新選擇，又粥底、又蒸氣鍋咁。但我都係偏愛雞煲，自己腸胃唔係好，只可以偶然食，但又相當滋味👍🏻今日同幾個朋友去到紅磡諗住打邊爐，但經店員介紹後，我地決定試下雞煲。原隻雞煲幾有份量，而且食得出雞幾鮮，唔係雪藏野，幾有肉地，而且唔鞋口😋我地揀左漁樂鍋醬雞煲，點少辣，啱啱好。個醬幾杰，幾容易入味。而且個爐滾得快，唔洗等好耐就食得，正。食完雞煲，例牌加水打邊爐，鍋底都唔會太油，點左幾款配料。值得一提，呢度D配料唔會好貴，雖然唔係話好正好正果隻，但計番價錢，都幾抵食👍🏻手切牛肉冇乜筋，食落唔un，另外墨魚滑幾好食，夠彈牙。至於咁濃味嘅雞煲，當然要點D好似響鈴、豆卜、蔬菜呢D咁吸汁嘅配料😋原本想點雞骨丸，聽落好吸引，可惜賣哂，點左貢丸，都幾彈牙。整體漁樂鍋嘅質素真係唔錯，最重要係埋單時見雞煲做緊優惠，收左$1！咁就真係超級抵😍