鴻星中菜 (已結業)

同Honey,阿妹和表弟妹一行5人去鴻星食餐大閘蟹本來期望不太高,但點知有意外驚喜因為我們食完tea有d飽...所以叫了一個4人餐,諗住食住先到時食落唔夠再加餸。全晚服務都唔錯，除了個男部長全程面黑黑之外，d阿姐個個都幾好人、幾有交帶，我們每人都有一set食蟹叉、剪刀及透明膠手套，換碟亦算勤力，值得一讚! 經同事推介之下，上星期去過西環個間四季餐廳食大閘蟹，相比之下西環個間簡直係垃圾喇! 又無透明膠手套，d侍應服務態度又差，大中細蟹一碟咁上要d客自己揀自己分，其他食物份量少之餘而且好難食，食到最後又無薑茶飲添呀，真係諗起都嬲!我們叫的4人大閘蟹餐一共有8隻公4隻乸，侍應好細心咁幫我們分開公乸各一碟上，我食咗一公一乸味道都唔錯幾鮮甜，雖然乸就細隻咗d, 不過本人喜歡佢d膏比較結實。除了主角大閘蟹之外, 還有...蟹粉小籠包...多汁好味!半隻鹽焗雞...普通啦~一條清蒸石班...鮮甜!翠肉瓜炒蝦仁...好味d蝦好大隻好新鮮!腊味糯米飯...正!!薑茶...有d辣!糯米糍...好味!糖水...一般，因為小弟唔太喜歡食綠豆沙!結果大家都食到好飽; 大閘蟹食剩咗一隻，隻雞同糯米飯都食唔哂!