泰肥牛海鮮火鍋菜館 (已結業)

平時好少落佐敦食飯，朋友說佐敦近廟街處有間新開的泰國菜館，門口經常有大量客人等位，抱住唔蝕底心態，同六七名友人落菜館試下，果然係一間好嘢。當日試了海蝦刺身，6隻68蚊，12隻115蚊，當然後者較抵，的確，刺身一上枱，唔使十分鐘只剩回吉碟，蝦肉爽夾滑，新鮮度爆燈，加上秘製調味汁，經眾人不用3分鐘的商議，即時再order多一碟。酸辣鳳爪又是佳作，怕食辣的朋友亦大叫好味，因為其辣不嗆喉，鳳爪亦好爽，50蚊大大碟，好抵食。冬陰功大頭蝦湯是我的至愛，味道濃，層次亦分明，唔會一味辣，蝦味在口中久久不散，我比100分，118蚊大大煲，抵飲又好味。青㗎喱豬亦不差，但略嫌汁液太杰，朋友話一向係咁，可能我少食青㗎喱，但味道又確實唔錯。咖喱炒肉蟹，308蚊，看似好貴，但吃着充滿咖喱香味的肥美肉蟹，感覺實在滿足，不過，食時要好小心，事關，我 就食到T恤一滴滴咖喱汁。炒椰菜苗，算是當夜較失望之作，因為菜苗比較老，不過跟老闆反映過後，極nice的老闆即時替我們換另一種菜，驚喜到而家。絕招炒花甲王，唔使講嘢，必食。炸釀珍寶雞翼，飯局尾聲已飽了九成，但實在忍唔住將雞翼放入口，食完先算咯。