Nico's Spuntino Bar and Restaurant (已結業)

今次係團購優惠，$128+$13service charge嘅半自助lunch buffet。以呢個價錢可以喺soho區食semi lunch buffet 確係抵。呢度環境舒適，絕對係享受weekend嘅好開始XP。任食嘅係頭盤同沙律，選擇唔算少，食齊其實已經有啲飽。食物嘅賣相好吸引，而且亦幾特別。有一款好似pizza咁，但應該係茄子，整得好爽，好好食。而Ham同沙律有好幾款供選擇。主菜每人可以揀1個份。我哋揀咗豬扒配薯條同辣肉腸pizza。主菜份量大，而且賣相亦好吸引，絕冇因為係團購而欺場。豬扒炸得脆口，肉質鬆軟，但薯條就麻麻，唔夠脆，好快就淋哂。Pizza方面，芝士同腸份量適中，味道唔錯。因為餅底好薄，所以唔會太滯。至於甜品，可於buffet枱任選，都有5-6款選擇。但我就覺得略甜咗啲，所以每件只係試咗少少。雖然限時90分鐘，但已相當足夠，好滿足。其實呢度正價menu都唔算太貴，絕對可以encore。