添福小食 (已結業)

今晚收咗工之後去深水埗探個朋友，朋友咁啱又未食飯，叫我買啲外賣上去佢屋企度食，所以就去咗添福小食度買漢堡包薯條等等嘅小食啦。叫咗big Mac、芝士薯條，熱狗王同埋椒鹽雞塊。係拎返去朋友屋企嘅途中已經聞到小食喺袋裏面散發嘅香味，香氣撲鼻，令人食指大動。到埗，開餐。薯條炸得好香脆，每條都有好飽滿嘅薯仔肉，同一般快餐店嘅薯條唔一樣，再點上芝士醬來食，定令人停唔到手，一條接一條。炸雞塊可能係返炸嘅原因，有啲硬，但係因為佢係表面上撒左椒鹽，同埋都算熱辣辣，幾香口。Big Mac ！即叫即做，牛肉漢堡裏便睇得出有調味過，同埋有夾雜洋蔥粒，相信係人手炮製嘅，配埋其他配料，包括爽脆嘅生菜同埋香甜嘅蕃茄再加埋底下嘅芝士，係我今餐最滿意嘅食物。最後熱狗王！熱狗包焗得香脆，配上多到爆炸嘅番茄醬同埋芥末醬，一啖咬落去好滿足。我叫咗四樣食物，總共先$78 ，兩個人食抵到爛。