小松鼠 (怡豐花園) (已結業)

小松鼠三年前食過幾次，印象最深刻係佢嘅蘑菇湯，又香又濃又 creamy，仲有就係漢堡包，比麥當當貴啲啲，但係質素就高幾皮。今次再去，叫咗個二人餐，包括餐湯，頭盤，主菜兩款同飲品，咁多嘢加埋都唔過二百蚊，超級抵食。久違嘅蘑菇湯比之前失色，質感較稀，味道亦較淡😐，跟湯嘅蒜蓉包則唔錯，有誠意。頭盤我哋揀咗黑松露薯條，份量好多，炸得都幾香脆，不過黑松露味就唔太突出。主菜首先係煙三文魚 Risotto，呢個屬正常水準，Risotto 雖然煮得比較腍，醬汁亦都比較稀，但係調味得宜，芝士亦算多，味道唔錯。成晚最好食嘅就係另一個主菜手打安格斯牛肉漢堡，漢堡扒夠厚有肉味，個包面鋪滿我最鍾意嘅芝麻，水準同三年前一樣咁高😋。