Holly Brown (已結業)

今日約埋好姊妹去欣賞商場聖誕裝飾，順便去中環坐摩天輪。為左避開午膳既人潮，我地行到大約2點，先去蘭桂芳附近搵食。係熙來攘往既大街小巷裏，我地發現左間新開既餐廳。門面一大排又高又大既落地玻璃，餐廳走舒適既Cafe格調，有開放式水吧，最入面仲有個電子琴演奏位，好似夜晚會有live band!最吸引各位靚靚們，應該係果一排七彩繽紛既雪糕櫃臺，原來呢度有意式雪糕供應!設有午餐供應，餐飲叫左啤酒同凍檸茶，凍檸茶茶底都好夠濃，cafe有呢個水準已經好唔錯。跟餐可選沙律或蕃茄湯，沙律菜好新鮮，蕃茄湯有濃濃既蕃茄味，酸酸甜甜咁，好開胃。燒澳洲肉眼扒配黑椒汁，肉眼扒又大又厚，肉汁完全鎖晒係入面，入口鮮甜又juicy，最犀利係標明草飼不含荷爾蒙，真係鋸扒鋸得開心又放心！香煎大蝦帶子忌廉汁意大利飯，大蝦夠爽，帶子又鮮甜，忌廉汁少少甜，配埋有咬口既意大利飯真係好好味，不過食多會有d膩。跟餐甜品係士多啤梨意式雪糕，又滑又甜。我受唔住引誘，點都要幫襯下個雪糕櫃，叫左個維也納，個名已經好有意景，雲呢拿意式雪糕，配花生醬、杏仁碎同布朗尼蛋糕，最重要係全部咁sweet既材料配埋，都唔會過甜，咁癬杯雪糕，我一陣就KO左。