味力HK (已結業)

星期六放假，晏晝搵好西食。發現海日升中心都幾多餐廳，但老人家只鐘愛中菜，於是揀左呢間。室內裝潢唔太cheap，唔似又舊又殘嘅冰室茶記，設計走四、五十年代中式古典路線，座位寬敞，環境雅緻。菜單主打潮式同港式小菜，滷水款式都幾多，午市仲有碟頭飯，確係識做香港人生意，勝在多嘢揀~我地嗌左蠔仔泡飯同滷水拼盤。老闆問蠔仔泡飯要一鍋定一碗，我地要左一鍋。蠔仔泡飯即係潮州嘅蠔仔粥，廣東人先叫為泡飯。同廣東粥唔同，唔係煮到又綿又滑就叫好，而係米粒頭尾要開花，米要粒粒分明，但食落軟綿，入口即化，就叫上乘靚粥啦。呢道蠔仔泡飯未算叫上乘，蠔仔鮮味一般，但味道都唔錯，而且蠔仔份量亦合理。而滷水拚盤，配搭款式時令。嗰期咩鮮整左咩滷水，店決定，所以嗌之前要問下店員或老闆。圖片只供參考，一張有牛肚，另一張無但有魷魚片。不過我地果碟呢兩樣都無 😂 而係有豬頸肉、豬大腸、豬肚、鴨肉、紅腸、豆腐，都算係包羅萬有。 而且睇到師傅刀工好熟練，切到所有料都件件均稱，大小一緻，落多幾條莞茜，擺盤自然好睇啦。不過滷水並唔香，完全食唔到花椒八角嘅香味，只有鹹味，普普通通。整體而言，無超級好食，但食得過，值得一食 😁