潮丸 (已結業)

今日去左筲箕灣食高質茶記，餐廳嘅食物主打港式粉麵飯，魚蛋、牛丸、墨魚丸都有！店內嘅裝潢都比較潮，懷舊同新潮嘅元素都有。燈光光猛，座位都比較多，空間闊落。我哋坐梳化位，坐得好舒服。我就食左一碗牛丸米線再加兩個小食。佢呢度牛丸幾出名，囗感幾彈牙，咬落去仲有啲汁爆出黎，食到肥牛嗰種嘅油脂，滲透左成個口腔，真係值得一試！粉麵仲可以自由配搭芫荽、芽菜、葱、蒜，落單嘅時候講就得㗎喇～我就揀咗最鍾意嘅芫荽同埋芽菜！小食方面，我就叫左炸墨魚丸同埋蒜蓉炸雞翼。炸墨魚丸口感好得意，墨魚丸外皮變得好香脆，入邊又好彈牙。蒜蓉炸雞翼，蒜味好香，個皮仲好香口添。服務員態度有禮，高質嘅茶記享受，去開港島嘅話真係一定要試下。