醉潮館

營業中

休息中

哥哥一家都唔喺香港，趁住週末陪下兩老，晚餐帶佢哋嚟荃灣食呢間口碑唔錯嘅潮州菜，我哋差唔多八點到，門口依然有幾枱人等緊，生意超旺。我自己之前食過一次，對佢嘅燉湯印象良好，今次嗌咗核桃蟲草鮑魚炖雞，湯味香純，濃郁清甜，仲真係有鮑魚，而且唔細隻，真材實料。一盅可以分到三碗仔多少少，我哋三個人分剛剛好，性價比高！九肚魚炸得又香又酥，口感外脆內嫩，味道鮮甜，沾上喼汁，令鮮味更濃。好有趣嘅名字，原來係四季豆炒豬頸肉，好夠鑊氣，醬汁香濃入味，豬頸肉咬起嚟好有口感，餸飯必備。BB乳鴿用鳥籠裝住，賣相相當別致。乳鴿雖然奀咗少少，但皮脆肉嫩，肉汁豐富，即使唔洗點五香淮鹽同喼汁都已經好滋味！黑松露蟹膏蒸水蛋係屈機之作，令我一直念念不忘，松露嘅香氣配上嫩滑嘅蒸蛋本來都已經係天作之合，加上大量嘅蟹膏，邪惡程度爆曬燈！每一啖都係享受！荃灣有得食潮州菜或者中式小菜嘅地方其實唔少，但能夠令人留低咁深刻印象嘅真係只此一家，難怪能夠喺短短幾個月賺到咁多口碑。