澳洲牛奶公司

營業中

休息中

平時去開呢頭剪頭髮，都會去澳牛食個Lunch。食咗咁多次都無幫澳牛寫番個comment，今次要寫番支持吓先。閒日晏晝等位唔算要好耐，一坐低就自動波識嗌，澳牛個哥仔都唔駛講啲乜已經搞掂晒。十年如一，炒蛋仍然都係咁好食，香滑唔油，又唔會過火變咗一粒粒。厚多鬆軟仲暖暖哋，火腿就一貫地無乜特別。叉燒意粉，正如飯氣攻心啲叉燒，唔會特別好食，填得飽你個肚就得。但正正係呢啲柴皮叉燒整叉燒意粉先好食，用太靚ge反而會唔夾。食到咁上下哥仔走埋嚟問飲乜，平時喺其他茶記都係嗌凍檸茶走甜，但去到澳牛，因為個茶膽okay，所以會嗌番正常，唔好嘥咗杯茶嘛。前後10分鐘落單到走人，好一個光速澳牛餐。