船皇 (厚福街) (已結業)

今晚約左同朋友係尖沙咀食飯，佢話想食船麵好耐，所以我地就黎到船皇。入到去環境都幾舒服，然後我地就睇餐牌睇下有咩食，見到佢有張升級優惠，我就升級左做和牛船皇湯麵，有和牛，牛丸，雞翼，雞絲，豬肉，豬肉丸同豬潤，好豐富啊。麵既種類係可以自己選擇，有蛋麵，米粉，金邊粉同埋河粉選擇，咁我自已就揀左金邊粉，辣度都有得自己選擇。朋友就揀左個撈麵。我碗麵黎喇，見到個湯底好似好濃味，即刻飲左一啖，真係好香濃。麵上面重有我鍾意既炸豬皮，連埋湯汁食真係好香口，牛肉都好嫩滑，一個人食一碗真係好滿足。另外我地重叫左一串魷魚鬚，同埋串燒雞肉同豬肉，沙嗲味好香，魷魚鬚好彈牙。飲品我叫左凍柚子檸檬梳打，佢裝飲品個杯好特別，味道都好好飲。