霸嗎拉麵 (已搬遷) 新店位置

話說大年初一搵食甚艱難啊，諗住醫飽肚去睇花車巡遊。心血來潮想食拉麵，就去登龍街碰下運氣，一於邊間開就食邊間。去到只有兩間正常營業，三田製麵已經試過啦，咁就「霸嗎拉麵」啦。 - 綠茶可樂（$25）原來咁好飲㗎！未試之前可能會覺得隻味會怪怪地，試咗就覺得好好飲好特別，綠茶有可樂味，可樂有綠茶味。 - 青梅蘇打酒（$18）同喺日本買嘅一樣，好飲啊！飲曬成罐慢慢會好似有啲醉咗咁，話曬都係有酒精，不過抖翻陣就無嘢啦。 - 雞叉燒味玉白湯拉麵（$88）「點解隻蛋唔咪切開兩邊嘅？」平時食拉麵嘅蛋都有切開，不過哩度就無切嘅，隻蛋算OK。試咗啖湯底，ummm，比較稀，唔似豚肉拉麵嘅湯底咁濃，飲落有啲似即食麵啲湯咁嘅。麵揀咗硬度適中，口感唔錯。塊雞叉燒好好味，仲幾厚身，入口慢慢融化，唔乾之餘又唔會太淋。個人鍾意有蔥花，成碗麵食落會香啲。 - 炙燒豚肉味玉拉麵（$88）湯底勁濃，比較稠，好似成碗都係豬骨嘅精華咁。豚肉好厚身，肥瘦適中，肉質較軟，同啲炸蒜碎一齊食，堅好味！雖然今日係年初一，但係「霸嗎」真係良心舖黎㗎，竟然唔洗加收喎～ 俾Like