勝面 (已結業)

之前幫襯隔離餐廳個陣發現咗呢間賣台式食物嘅店，晏就諗唔到食咩就一於試下。餐廳都幾光猛，但個人覺得有少少太光。地方同座位反而幾好，都算寬敞。當日serve我地嘅印象中係講國語嘅姨姨，唔知係咪特登請返台灣人，幾有親切感。-台式甜不辣拼花枝丸滷肉飯 $62滷肉飯份量頗多，大量滷肉淋於白飯上，腍軟但唔太肥膩。花枝丸熱辣辣且酥軟，稍嫌調味料太鹹。甜不辣切成幼條狀，入口軟軟韌韌，有啲似食緊魚蛋，口感唔錯。-鴉片黑糖波波鮮奶 $33見個名咁得意叫咗杯飲下，但甜度實在太高。之前都有飲過其他手搖飲品店嘅黑糖產品，正常糖對我而言都唔會太甜，自問自己都算食得甜野。但呢杯太死甜，撈勻飲都好甜。珍珠口感還可以，唔會出現雪到硬身嘅情況。建議大家想飲呢杯的話，最好叫少甜。