鬼金棒牛骨辣麻拉麵

營業中

休息中

鬼金棒牛骨湯拉麵係一間主打牛骨清湯湯底嘅拉麵，開正喺鬼金棒拉麵隔離。同鬼金棒一樣，湯底有普通同辣麻之分。我今日叫咗個味玉辣麻牛骨拉麵（中辣，小麻）。湯底好濃牛骨味，起初以為自己食緊台灣牛肉麵 😂 飲落好順口。除咗好特別嘅牛肉叉燒之外，拉麵亦都落咗好多洋蔥，香得來唔會搶咗湯底嘅牛骨香味。麵條偏幼身，掛湯一般。味玉有驚喜係流心蛋，而且用醬油醃製過。食完碗麵，我仲加咗碗白飯。放落剩返嘅湯變湯飯，啖啖牛骨鮮香，真係好正🤤 唯一可惜係我叫咗中辣，少少冚過咗湯底本身嘅味道。如果叫小辣，我相信牛骨味會再出啲，食得辣又鍾意牛骨湯嘅人可以試一試 😉