BnR (已結業)

朋友啱啱去完旅行返嚟，話要攞啲手信畀我，相約喺荃灣大壩街「BnR」食午飯。餐廳環境唔錯，裝修新淨，開揚光猛，加上空間感十足，令人倍感舒適。餐廳主打濃雞湯、鮮魚湯同特色湯，餐牌選擇好豐富，有淮山麵、泡飯、米線同小食等供應。點左炸墨魚卷、花膠釀魷筒淮山麵同波波雞飯，午市點主食送熱奶茶、熱咖啡或汽水，+$5 可以轉凍奶茶、凍啡或豆漿。炸墨魚卷 ($42)  呢碟墨魚卷幾有驚喜，真材實料，外層炸至金黃色，入面有粒粒Q彈墨魚，點埋個甜辣醬食，外脆內滋味！另外呢碗藥膳花膠釀魷筒淮山麵 ($88)  用料亦唔手軟，花膠大大塊，稔得嚟又有咬口；魷魚筒勁足料，入面釀滿了墨魚膠，食落彈牙有口感，海鮮味十足。淮山麵煮得啱啱好，質感柔軟、爽滑富彈性，每條都沾上藥膳雞湯 🐔 配料下得非常大方，有油條、雲耳、粟米芯等，份量超多。至於碟波波雞飯 ($65)  賣相都幾別致，雞件皮薄脂肪少，雞味濃郁且肉質嫩滑，加上已經全部去晒骨，非常方便享用。油飯口感軟糯、油香十足，最鍾意就係佢做成波波形狀，好睇又好食。