明明車仔麵專門店 (軒尼斯道)

營業中

休息中

喺灣仔區食車仔麵，不得不提明明車仔麵，筆者我已經幫襯過無數次，但而家先得閒上嚟寫食評。因為公司喺附近，所以我多數選擇外賣自取($42三餸，送紙包飲品)，呢間分店會放張茶几喺門口，方便叫外賣嘅客人喺門口攞紙仔寫食咩，客人最好寫埋自己個姓氏，因為轉頭嗌攞外賣係靠姓氏去識別架！寫好之後交俾入面嘅店員，俾完錢之後就企喺外面等。之後，你會聽到一把響亮嘅女聲喺度大嗌："姓陳嘅米線....."、"姓黃嘅米粉......."，叫啲客去攞返自己份外賣。食物方面，基本上佢每樣餸都係好味，我同同事食過咁多次，暫時未試過有劣食，印象中只有一次整得無咁好食之外，其餘每次都係高質素保證。我最中意食佢嘅豬軟骨同豬紅，前者整得相當入味，軟骨煮得啱啱好，唔會太硬或太軟；至於豬紅就係車仔麵嘅絕配，質感非常有咬口，同湯底好夾。不過，自從佢豬軟骨要另加$2之後，我都少嗌左，因為佢仲有好多其他車仔餸可以選擇，今次我就嗌左墨丸、通菜同埋豬紅，味道一貫地高質，但通菜份量就略少。整體嚟講，明明車仔麵算得上係灣仔區一間高質車仔麵。