香港仔茶餐廳 (已結業)

係灣仔原來都有水準不錯的打冷店，據老闆娘透露，原來以前佢哋已經係做打冷起家，唔怪得打冷小菜咁有水準！今日難得同朋友收工過嚟試咗佢哋啲滷水拼盤，真係好唔錯，墨魚有咬口！仲有鵝腸，係熱辣辣架！浸埋啲滷水汁好入味，下面再配上芽菜，一路食滷水，再飲可樂，真係好夠嘆！食完幾碟滷水都唔夠喉，再叫多個滷水拼盤，今次有豬大腸同埋生腸，啲腸洗得好乾淨，冇臭味之餘，脂肪比例亦非常均勻，有陣陣香氣！另外依款生腸都好少喺出邊食到，做得咁出色，師父果然係功架十足。另外呢度嘅牛腩亦唔可以講笑，炆得剛剛好，腩汁好深色，用上嘅香料應該唔少，小小鹹味嘅腩汁送飯或米線，係返工一族最佳選擇。試埋呢度嘅豉椒炒蜆，蜆肉均稱，無沙石，配埋青椒紅椒賣相吸引，熱辣辣上碟，完全係夢寐以求嘅味道。估唔到呢度仲有得食公司三文治，裏面用上免治牛肉，好厚！有半隻手掌嘅厚度。麵包明顯經過烘焙，黃金色勁外相，仲有蛋同生菜，正！最後飲埋呢度嘅住家湯，係粟米紅蘿蔔湯，完全食唔到有味精嘅味道，飲多幾碗都唔怕！