麺屋こころ (軒尼詩道)

營業中

休息中

一直都想試呢一間好耐，但係唔係成日都經過灣仔，終於有一次經過灣仔，所以特登入去食。呢間唔係食拉麵、沾麵或者烏冬，佢淨係做撈麵。就咁望到佢嘅樣已經覺得十分之打卡able，而店員都會同你介紹點樣食係最好食，例如加入黑胡椒、加入香醋同埋最後撈飯食，但係由於個胃真係冇咁大，最後都冇試到加飯。‣ 正宗全料東京撈麵 $109 ⭐️⭐️⭐️⭐️⭐️雖然係撈麵，但係醬汁份量啱啱好，食落口嘅時候唔會覺得乾。仲有個生蛋黃令麵食落口嘅時候相當滑溜，而且充滿蛋香，仲補多一隻溏心蛋比你。佢嘅豬腩肉比較厚身，但係食落唔會有好肥膩嘅感覺。豬腩肉嘅邊位有輕輕燒過，所以咬落去嘅時候有少少焦香，個人幾鍾意呢個做法，可以突顯到豬油嘅香味。竹荀醃製得唔錯，正常發揮。面頭嘅肉碎加埋生蒜、韭菜、蔥花同埋魚粉，我覺得成碗撈麵出到嚟好香，自己都跟足個食法逐啲加黑胡椒同埋醋。加咗黑胡椒之後食落又真係更加香口，有唔同嘅感覺。而醋就後期先加，又係另一種味道，唔會令到你覺得食到好膩，食嚟食去都係同一隻味。不過食完個口臭臭地，記住要帶啲薄荷糖清一清個口。