豪華咖啡茶廳

營業中

休息中

相信唔少打工仔都會有荷包緊張嘅問題，我自己身邊都有一個朋友，佢話啲同事成日去食貴野，搞到佢荷包好緊張。所以我就建議，既然係咁間唔中去食平野中和下。其實想慳錢有方法，就好似灣仔，都幾多平嘅嘢食。今日介紹你嘅呢間位於英皇大廈側邊條街，豪華咖啡茶廳。睇睇餐牌除咗碟頭飯、意粉，仲有公仔麵或者多士選擇。而點解我會話好平嘅原因係，我叫一個公仔福麵都只係22蚊，無錯呀平過麥當勞個餐啊。而且柯打無耐就十分快到，真係好岩乜都要快嘅香港人啊！福麵無多無少一整個，同平時煮隻麵嘅份量無異。而餸呢除咗沙嗲牛肉、仲有雞翼、炸魚柳選擇，而鐘意味濃啲嘅我最岩就沙嗲牛肉。味道合格、肉量適中，位於灣仔呢個價錢，執到啦。本身驚驚地唔夠飽又有啲口渴，最岩就叫番支可樂頂頂胃，尺寸有大有細，價錢都係相差1蚊，咁你話要大定要細吖，當然係飲得哂先好叫，哈哈。下次有機會會試下佢個燴汁意粉，再評一評。