成都老碼頭火鍋 (已結業)

來到旺角呢間裝修古色古香成都老碼頭火鍋，感受成都火辣辣風味。原來客人用手機點單有汽水送，另外在7:30前離座或21:30後入座可享68折優惠，全日88折。自助醬料區同水果區，當日生果有細腰芒同蜜瓜，可以解辣。湯底煮煮下會好滾，可以著餐廰提供紙圍裙，避免被辣油彈污糟。湯底揀左成都風味中辣+豬骨湯$188 ，中辣好多大辣椒粒同細麻椒粒，越煮越辣，餐廳冷氣好夠涼，如果停落黎進食會覺得凍。鴨腸半份$68:鴨腸用隻鴨仔裝住，外型可愛，燙15秒左右，保持脆度夠過癮﹗鮮毛肚半份$88:係朋友鐘意既黑色毛肚特別爽脆。牛黃喉半份$48:主要食爽口質感，不會好吸麻辣汁，爽口又惹味﹗滑溜溜鴨血半份$36:圓形鴨血，一開鍋就放落去麻辣湯底，索晒麻辣味﹗澳洲雪花肥牛半份$82:見到清晰雪花紋理，都食到牛肉味﹗台灣水蓮菜$48:香港好少火鍋店可以食到菜式，條條幼身，煮完仲係保持嫰綠爽口。鮮魚膘半份$52:煮耐左會收縮，好吸湯汁，爽口又惹味。門口位置有部清新吹風機，可以讓客人消除身上火鍋味道。帶上口罩後，整個嘴唇仲保留刺激麻辣感，火辣辣餘韻﹗