8鍋臭臭鍋 (金巴利道) (已結業)

食火鍋食左咁耐都係第一次食呢種臭臭鍋，係尖沙咀周圍行，見到好多間餐廳，多數都係韓國菜，日本菜，見到呢間叫做8鍋臭臭鍋，睇下餐牌價錢又唔貴88蚊已經有個奪餐，又飯又野飲，即刻入去食啦。入面地方都好多，咁岩我黎食個時係餐廳員工食飯時間，我都唔好意思，但佢地服務都好好，即刻有人過黎解釋同俾餐牌我地。枱上都有幾種調味料俾我地選擇，仲有教點解加先係最好食，真係細心，不過因為我唔食得辣，所以我都冇跟佢，只落左蒜泥同豉油。我叫左3號餐，芝士牛奶鍋，牛奶味好濃好正，入面有烏冬，心型魚豆腐，麻吉燒，沙白，蟹柳，炸枝竹，嗚門卷，蛋餃等等，其實都好多材料，另外套餐仲有一碗白飯，好飽。仲有一個咖哩芝士奶蓋鍋，奶蓋同出面飲個Ｄ都似，芝士好香好濃，咖哩比較甜，入面有沙葛，黃金魚子球，甜不辣，炸魚蛋，粉絲，四季豆，栗米等等，款款都有自己特別既材料，呢個最特別最好味黃金魚子球。唔夠仲可以在加白飯 / 粉絲，當然仲有好多其他唔同既材料啦。套餐入面有包野飲，一杯紅茶一杯綠茶，紅茶比較甜，綠茶清淡Ｄ。成日食火鍋既朋友，有機會可以黎試下呢間，真係好特別，價錢又夠平。