千賀水產の鮮鍋道場 (已結業)

過2日就冬至啦，梗係要食豐富D啦！今日我地成班同事就揀咗嚟呢間千賀水產食lunch。本來以為佢只係semi buffet，以為淨係D菜、丸類、甜品、飲品係任攞，點知原來出面個任食任飲區，直程就已經係一個非常完整嘅buffet，包羅萬有。淨係熟食就已經有廿幾卅款，炒飯、麵、蒸魚、霸王雞、醬油鴨、青口、炸饅頭、燒賣、蛋糕、沙律、雪糕、生果、飲品……乜都有齊，仲要分晒區，中式區、歐洲區、日式區等等等等，非常多選擇。由於我地嘅午膳時間不多，所以選擇咗可以食2個鐘嘅"任食火鍋肉之放題環球美食"。呢個餐除咗可以任食出面嘅所有熟食、甜品、生果和飲品之外，火鍋肉(包括豬、牛、羊、雞)都係任叫任食。另外，值得一讚嘅係，每次我地落完order之後(火鍋肉)都好快就送到，完全配合到我地嘅進度。總括來說，"千賀水產"呢度嘅食物款式多，上菜快，質數絕不會因此而渣流攤。唯恨我地無揀到4小時嗰個餐，所以無得烚海鮮和餃子。但見到隔離枱烚海鮮食得津津有味，一眾同事們已經約定下次一定要再嚟烚過。