羽山冰室 (已結業)

又到中午放飯時間，今日決定試呢間羽山冰室，睇過好多評價都話唔錯，d款式都幾多，今日就黎試試啦。小店主打3.6牛乳炒蛋，餐牌上好多都離唔開炒蛋，但配搭都幾多，唔想食飯除左普通常餐仲有蕃茄濃湯麵食，或者想食包類都有3文治餐，都有飲品跟。跟餐有老火湯送，無味精味道還好啦。燒汁吉列豬排滑蛋蓋飯，吉列豬排係港式吉列豬，小弟都鍾意食港式吉豬多過日式，炸得幾香脆係乾左少少，面頭加左好多燒汁同紫菜碎食落就無咁乾，炒滑蛋俾豬排同飯既熱力冚住已經偏熟左d，但食落都好滑，可能加左牛乳既關係，飯軟硬適中，飯會有d榨菜跟俾你，偏咸同少少辣，唔鍾意既朋友記得叫侍應姐姐走左佢啦，講真個成個飯好食過好多日式餐廳果d喎，價錢又差唔多。照燒雞排炒滑蛋飯，呢份炒蛋相對賣相會靚好多，雞排都正常無咩特別，都係會跟榨菜。