瓏門冰室 (已結業)

講開尖沙咀食常餐既地方，一定會數到瓏門冰室。位置於金馬倫道，位置幾方便。其實以前各區都曾經開過好多分店，但而家淨返呢間，希望佢仲捱到下。由早上七點到十一點半都有早餐供應，主要分為雙餸麵餐、芝士玉子餐、歐陸滋味（姐係扒餐）同常餐。今次去到叉燒賣曬，最後揀左雪菜肉絲湯米線 配 炒蛋白、芝士腸、奶醬厚多士（$39）。炒蛋白仍然係咁大份，有時食下淨蛋白感覺好似健康啲。奶醬多今次烘得燶啲超香口，不過就唔算太多花生醬同煉奶餡。主菜黎講我最鐘意瘦叉，其次係雪菜肉絲，以前既雪菜係好青綠既新鮮菜整既，今次既雪菜就變左普通，好想食返之前嗰種。麵底可以免費轉通粉/意粉/米粉/公仔麵/米線，無論邊種都係偏淋，如果想食硬身啲記得揚聲！瓏門既早餐選擇係好多選擇同好大自由度，主菜、配菜鐘意點轉都得，間中都好enjoy呢種自由！