Chibee Chicken and Beer (已結業)

唔知點解韓國嘢定期都會突然好想食，但普通燒肉實在食得太多，睇開韓劇諗起好耐冇食過炸雞，就即刻心郁郁去搵一下！睇到呢一個標誌就諗起韓國地道嘅炸雞餐廳！夜晚大約六點，人流還未算多。呢度坐得幾舒服幾闊落。我地點左一份熱熔芝士炸雞，炸雞一開始上嘅時候就只有原味，沒有任何添加醬料。職員之後攞出剛剛燒熔嘅芝士淋上去，新鮮滾熱辣，已經傳來陣陣芝士香味！淋完芝士之後，建議大家要快啲夾來吃，因為芝士冷卻之後又會凝固。炸雞炸得好香脆，入邊嘅肉亦都仲好嫩好滑，能夠保留到肉汁！配上芝士嚟食份外上癮！魚糕湯鍋估唔到份量咁大，湯底好鮮甜有少少嘅微辣！魚糕煙韌彈牙！真係令人好懷念韓國街邊小食檔阿豬媽嘅魚糕串！最尾仲食埋粟米，有勁多芝士！粟米好香甜，一口接一口！呢度過咗八點之後越來越多人，當中仲有好多韓國人來幫襯，味道有一定嘅保證！