永順食店 (已結業)

並唔係元朗人, 有機會大鄉里入城, 一早去openrice做下功課.  原來元朗人咁好口福, 大小食肆多國菜式任君選擇.  我一早袋定幾間入"我的餐廳", 行山前後-早餐、下午茶甚至晚餐都可以有得揀. 行完山剛好3點3, 小巴站最近係大榮華, 一班鄉里諗住去大榮華飲茶, 唔知係咪中秋正日, 下午茶已截單, 立即實行Plan B, 有緣試左永順. 呢間鋪都幾神秘, 搵到個大廈名但原來間鋪唔喺大街, 圍住楝大廈兜左個圈, 原來喺正門後面. 話雖如此, 去到2間相連鋪都坐滿人(大部份係男人), 心諗應該有D料到. 大家睇住牆上個餐牌, 又雞翼, 又豬扒, 又一丁, 正係我地呢D"青少年"既至愛, 決定要配個檸樂黎賀一賀佢. 可憐我身懷六甲, 唯有揸項就命, 叫左豬扒蛋治加樽裝鮮奶.  等左2,3個字, 食物開始上枱.  豬扒鬆化, 雞翼嫰滑. 無他, 二個字, 新鮮. 有D唏噓, 如此簡單食材, 因為新鮮, 味道提升百倍. 元朗鐵路相連, 交通方便, 樓價亦拍得住市區. 希望喺租金飛漲既環境下, 此類小店仍然有生存既空間.