營豐海南雞專門店 (已結業)

開心星期五 - 媽咪懶得煮飯，所以買咗唔同嘅外賣返嚟食。我都唔執輸，買咗個雞返嚟加餸。店面雖然唔係好大，冇堂食位置，但係都有好多選擇，有唔同款嘅雞 : 有海南雞、文昌雞、鹽水鴨等等。除咗呢啲平時餐廳都有得食嘅口味，佢仲有啲比較有特色嘅口味 : 霸王麻香口水雞、醉鄉花雕雞同藥膳雞。個人對呢重口味啲特色口味就冇乜興趣啦，最後我都係叫左口味清清地嘅文昌雞試下，半隻都係$88，唔算貴。隻文昌雞唔算好肥，皮薄有肉汁，啲肉食落去好滑好爽，應該係煮完有過冷河。本身隻雞都有少少鹹味，但都配有豉油、姜蓉同醋，可以迎合唔同口味嘅需要。我好欣賞佢個姜蓉，唔係好油但好重薑味。呢間鋪頭可以再試，有機會下次要試埋佢其他雞。